في موسم 2000/2001 قعد طفل صغير يتفرج على ماتش كورة بين فريقين كان عارفهم عن طريق النشرة الرياضية مش اكتر .. برشلونة صاحب المركز الخامس كان مستضيف فالنسيا صاحب المركز الرابع ع الكامب نو في آخر ماتش في الموسم .. دي معلومات عرفها بعدين طبعاً.






الطفل الصغير دا قاعد متوتر لاول مرة في حياته بسبب ماتش كورة لسبب هو نفسه ميعرفوش .. اخوه حاول يغير القناة بين الشوطين وكانت النتيجة انه قعد يعيط وكان حيكسر التليفزيون لحد ما امه قررت تقول لاخوه "سيبه يتفرج ع اللي هو عاوزه ومتضايقوش".

ملحوظة* الماتش كان مسجل أصلا

جول هنا وجول هناك ويخلص الماتش 3-2 لبرشلونة وياخد المركز الرابع من فالنسيا ويتأهل لدوري أبطال أوروبا .. والطفل الصغير ميعرفش كل دا لكنه لم يمنع ان الواد الصغير دا طار من الفرحة لاول مرة في حياته بسبب ماتش كورة بيعتبره حتى الآن من أفضل الماتشات اللي شافها في حياته .. ودي كانت البداية

دوتريل، سيرجي, دي بور, بويول, قابري
كوكو, غوارديولا, سيماو, اوفر مارس،
ريفالدو و كلويفرت

دي كانت أول تشكيلة معروفة لبرشلونة للطفل دا وبداية حمله رسمياً لبلاء العشق الكروي
ترتيب الليغا الموسم دا كان
1- ريال مدريد 80 نقطة
2 - ديبورتيفو 73 نقطة
3 - مايوركا 71 نقطة
4 - برشلونة 63 نقطة
5 - فالنسيا 63 نقطة

الماتش دا كان سبب في عشقه لريفالدو خصوصاً بعد الجول التتالت "الأسطوري". ريفالدو كان معاه 23 جول تاني هداف في الدوري بعد راؤول 24. برشلونة كان فريق فاشل دفاعيا بكل المقاييس .. ديون كتير بسببها إتنحى نونيز عن منصبه اللي مسكه غاسبرت واستمر في زيادة الديون.
-الموسم اللي بعده .. برشلونة ينهي الموسم في المركز الرابع بعد البطل فالنسيا والوصيف ديبورتيفو لاكرونيا وريال مدريد.

- موسم 2002/2003 .. برشلونة ينهي الموسم في المركز السادس وريال مدريد بطل للدوري.

- موسم 2003/2004 .. برشلونة وصيف البطل "فالنسيا" .. ديبورتيفو تالت وريال مدريد رابع.

- موسم 2004/2005 برشلونة ينهي الموسم أخيراً متصدر للدوري الإسباني لأول مرة من موسم 99 متقدم ع الوصيف ريال مدريد -فياريال وبيتيس تالت ورابع- .. وأخيراً يحتفل الطفل الصغير بأول دوري لبرشلونة في عهده التشجيعي بعد ما تحسن حال الفريق في الموسم التاني لريكارد بوجود رونالدينيو، إيتو، جولي وديكو وبدأ البعض يقول إن فريق الأحلام راجع تاني.

- موسم 2005/2006 برشلونة يحقق الدوري التاني ع التوالي بفارق 12 نقطة على ريال مدريد -فالنسيا واوساسونا تالت ورابع- .. دا غير نجاح اوروبي بالتتويج التاني في دوري الابطال على حساب ارسنال في باريس بعد غياب من سنة 92. واستحقت التشكيلة وقتها لقب فريق الحلام بدون شك.

- موسم 2006/2007 برشلونة في المركز التاني رغم تساوي النقاط مع ريال مدريد اللي فاز بالدوري.

- موسم 2007/2008 برشلونة في المركز التالت ورا ريال مدريد البطل والوصيف فياريال. وريكارد يمشي بعد ما فريق الاحلام اتحول لفريق من السكرية والنسونجية والشمامين.

2008/2009 إستلم غوارديولا الفريق .. مش محتاج أحكي عن الفترة دي لحد الآن لأن كل المشجعين الجدد المعجرفين عارفينها بما انها كانت ابرز سبب لتشجيعهم للفريق.

الطفل دا هو أنا .. وأنا مبقولش الكلام دا عشان اقولك انا اقدم منك وبفهم اكتر منك او بتباهي بأقدميتي التشجيعية وبلا بلا بلا .. بس عاوز اقولك ان في ناس شجعت الفريق دا وهو زي الزفت وعاشت معاه ايام اسود من اللي انت فاكرها سودا لمجرد انه كل موسم بيطلع ع الاقل ببطولة واحدة بس!

بلاش تشتم في الفريق وتعصب في دمك، الفريق مش عاجب سيادتك تقدر تشوف غيره. الكلام طبعاً لجمهور برشلونة بتاع الجزيرة الرياضية زي ما لقبهم كاتب بمجلة "سبورت" يوما ما.

أنا شوفت الفريق بيحقق 3 دوري أبطال في الوقت اللي أغلب جمهور الريال من الشباب شاف واحدة أو مشافش خالص! في مسمى دوري الابطال الجديد بنظامه الاقوى حققنا أربع بطولات.



..
من حقك تنتقد الإدارة، المدرب، اللاعبين ..
بس فكر قبل ما تبدأ تشتم فريق إسمه "برشلونة"
الغرض من الموضوع مش تبرير وضع الفريق،
الغرض نصح الجمهور المتحمس قليل الخبرة